सांजवेळ

दिवस चिंब भिजला
वळचणीला बसला
काळोखाच्या पदरात
उजेडही लपला

पाखरांचे पंख भिजले
वाऱ्याने जरा थरथरले
आडोश्या कोपऱ्यात
दोन जीव ओले
 
किर्रर्र रातकिड्यांची
टपटप पागोळयाची 
भरल्या नभात
कडकड विजेची

संध्या छाया  मंद
रातराणीचा धुंद गंध
लपलेला ढगात
चवथीचा चांद

मी शांत तुही गप्प
वाफाळता कॉफ़िचा कप
सांजेच्या डोळ्यात
अनिवार झोप 

डोळ्यांची गर्द निळाई
पाठीवरला तीळ मृण्मयी
मखमली झोपेत
पावसाची अंगाई